Претседателски избори во Бугарија: Речиси 40.000 пријави за гласање од странство

Речиси 40.000 Бугари во странство поднеле пријави за гласање на претстојните претседателски избори, соопшти Централната изборна комисија (ЦИК), пренесува БГНЕС.

До 10 октомври гласачите со трајна попреченост можат да поднесат барање за гласање со подвижна гласачка кутија. За формирање такво избирачко место потребни се најмалку 10 барања.

Мобилната апликација „Избори 360 степени“ веќе е достапна за уредите со Android и Apple. Таа на едно место обединува информации за изборниот процес, електронски услуги и практични алатки и е поделена на два дела – за гласачите и за членовите на избирачките комисии.

Гласачите можат да користат интерактивна карта на избирачките места, да го погледнат целосниот список на кандидати за претседател и потпретседател, да се запознаат со симулаторот за машинско гласање и да поднесат електронско барање за гласање според адресата на престојување. Рокот за поднесување на ова барање е 10 октомври.

Поправката на машините за гласање се одвива според предвидениот распоред. Веќе 2.000 машини се целосно исправни. Претстои генерирање на хеш-кодот преку доверлива постапка од изворниот код на системскиот апликативен софтвер што ќе биде инсталиран на машините. Хеш-кодот ќе биде јавно достапен и ќе се отпечатува на контролните потврди од машинското гласање.

Машините што ќе се користат на избирачките места во странство ќе бидат транспортирани како дипломатски товар.