Стопанската академија „Димитар А. Ценов“ во Свиштов, Бугарија, ја одбележува својата 90-годишнина со празнична програма

Стопанската академија „Димитар А. Ценов“ во Свиштов, Бугарија, ја одбележува својата 90-годишнина со богата празнична програма, која вклучува меѓународни научни форуми, културни настани и студентски фестивали, соопштија од прес-центарот на високообразовната установа, пренесува БТА.

Одбележувањето започнува на 5 ноември во 10 часот во Амфитеатарот 1, каде што официјално ќе биде отворена Меѓународната научно-практична конференција „90 години донаторство, знаење, иновации и одржлив развој во Стопанската академија ‘Димитар А. Ценов’ – Свиштов“. Научниот форум ќе трае до 7 ноември. Веднаш по отворањето, во 11 часот, пред зградата на Ректоратот ќе биде направена заедничка фотографија на учесниците и официјалните гости, по што ќе следува посета на Академскиот музеј, кој годинава ја одбележува својата 70-годишнина.

Централната свеченост ќе се одржи на 6 ноември, петок, во 11:30 часот, во салата на Првото бугарско народно читалиште „Еленка и Кирил Д. Аврамови – 1856“. По повод јубилејот на високообразовната установа во Свиштов, ќе се одржат свечен собир и празничен концерт.

На 8 ноември во 10:30 часот, пред Ректоратот ќе започнат традиционалната свечена церемонија и поворката со оддавање почит пред гробот на донаторот Димитар Ценов, по повод патрониот празник на Академијата. Веднаш по завршувањето на поворката ќе се одржи и свеченото доделување дипломи на магистрите, паралелно во Амфитеатарот 1 и во салата на киното „Латона“.

Новата недела започнува со акцент на идните студенти. На 9 ноември во 10 часот, во Амфитеатарот 1 ќе започне Денот на отворени врати за ученици.

На 10 и 11 ноември, Свиштов ќе биде домаќин на Националниот студентски фестивал „Вкусови и култури на KreativEU“. Програмата за 10 ноември ќе се одвива под мотото „Патувања, приказни и вкусови“. Отворањето на младинскиот форум и претставувањето на „Културниот пасош“ на учесниците ќе започнат во 10 часот во салата „Ректорат“. Во истата сала, од 13 до 14 часот, ќе се одржи и кулинарскиот настан „Вкусови на KreativEU“, на кој ќе бидат претставени традиционални јадења од државите што членуваат во истоимениот европски универзитетски сојуз.

Високата трговска школа „Димитар А. Ценов“, денес Стопанска академија, официјално била отворена на 8 ноември 1936 година со указ на цар Борис Трети, во кој е запишано: „Во градот Свиштов се основа висока трговска школа под името ‘Димитар Апостолов Ценов’, со цел да обезбедува теоретски и применети знаења во одделните гранки на стопанските науки“, пишува на веб-страницата на Академијата.

Во архивите е наведено и следново: „На 1 септември 1912 година, Димитар Ценов ѝ го завештува на бугарската држава своето богатство од над пет милиони златни лева за основање висока трговска школа во Свиштов според германскиот модел, поточно според моделот на ‘Ханделсхохшуле’. Во својот тестамент, Ценов го определува својот дар како ‘скромен прилог на народниот олтар’“.

Во 1945 година, Високата трговска школа „Димитар А. Ценов“ била преименувана во Висока школа за стопански и општествени науки, а во 1952 година во Висок финансиско-стопански институт. Со одлука на 37. Народно собрание на Бугарија од 21 јули 1995 година, установата била преобразувана во Стопанска академија.

Во јануари, Стопанската академија во Свиштов одбележа 173 години од раѓањето на својот донатор и патрон Димитар Апостолов Ценов.