Американска дипломатка на средба со студенти и претставници на бизнисот во Бугарија
Квалитетот на прехранбените производи, иновациите и здравите животни навики беа во фокусот на средбата на вршителката на должноста заменик-шеф на американската дипломатска мисија, Никол Фокс, со студенти, професори и претставници на бизнисот на Универзитетот за национално и светско стопанство во Софија, соопшти Амбасадата на САД во Бугарија.
На настанот се разговараше за американските прехранбени производи и додатоци во исхраната, производствените стандарди во САД и значењето на информираниот избор на потрошувачите.
Фокс ја истакна важноста на безбедноста, транспарентноста и научните истражувања во областа на додатоците во исхраната. Таа ги охрабри студентите да развиваат навики што придонесуваат за физичкото и менталното здравје.
Во дискусијата беше посочена и улогата на спортот, дисциплината и тимската работа во јакнењето на отпорноста кај младите и спречувањето штетни зависности.
Средбата беше можност да се разгледаат и економските врски меѓу САД и Бугарија, како и можностите што тие ги создаваат за идните претприемачи и деловни лидери.
