Банско станува џез престолнина на Балканот: 28-то издание на Меѓународниот џез фестивал ќе трае 10 дена
Банско, живописниот планински град во подножјето на Пирин, и ова лето се претвора во џез сцена од светски ранг. Од 1 до 10 август ќе се одржи 28. издание на реномираниот Меѓународен џез фестивал Банско, кој за првпат ќе трае дури десет дена, носејќи уште побогата музичка програма и неповторлива атмосфера, јавува БНР.
Љубителите на џезот ќе имаат можност да уживаат во настапите на врвни меѓународни и бугарски џез уметници на неколку сцени низ градот: Главната сцена, Светската сцена, сцената „Млади таленти“, Џез академијата, како и на различни локации во самиот град. Посебно внимание е посветено и на најмладите, кои ќе ги направат своите први чекори во светот на џезот.
Во рамки на фестивалот ќе настапат голем број познати имиња од светската сцена, меѓу кои се: Џон Бисли Трио, Габриел Палачи Трио, Кетрин Расел Трио, Нилс Ландгрен Фанк Јунит, Анат Коен Квартетињо, Димитрис Василакис, Султан Стивенсон Трио, Кен Окада Груп, Јојока со Христо Вичев, Њујорк Војсис, Џери Бергонци и Џорџ Гарзон Квинтет со Петар Славов.
Бугарската џез сцена ќе биде достојно претставена од реномирани изведувачи како што се Камелија Тодорова, Христо Јоцов, Ангел Демирев, Велислав Стојанов, Михаил Јосифов, Димитар Љолев, Борислав Јасенов, Стојан Јанкулов, Арнау Гарофе, како и многу други млади и надежни музичари.
