Бугарија ќе го постави пред ООН прашањето за безбедноста во Црното Море

Бугарија ќе се обрати до Советот за безбедност на ООН поради зачестените напади врз трговски бродови во Црното Море. Ова го изјави претседателката Илијана Јотова за „Нова телевизија“ по нападите врз два трговски брода во близина на бугарското крајбрежје на 13 октомври, пренесува БНР.

Бугарија работи и на вклучување вонредна точка за безбедноста на пловидбата во дневниот ред на претстојниот Европски совет. Не се исклучува ниту активирање на членот 4 од Северноатлантскиот договор, но таквиот чекор треба внимателно да се процени и би имал поголема тежина доколку биде преземен заеднички од повеќе држави, додаде претседателката.

За БНТ, претседателката рече дека е усогласен текст со нејзините колеги од Романија и Турција. На 14 октомври Јотова ќе има и дополнителен разговор со претседателот на Романија, Никушор Дан. Целта е да се воведе мораториум на употребата на дронови во Црното Море против трговската и цивилната инфраструктура и да се прекинат борбените дејства над морето, објасни Јотова, цитирана од БТА.

Претседателката потсети и дека министрите за одбрана на Бугарија, Романија и Турција разговарале за заеднички дејства, а во рок од 10 дена треба да се одржи средба за безбедноста на Црното Море, на која ќе се утврдат конкретни мерки.