Бугарија ќе учествува на средба на ЕУ за изградба на „ѕид од дронови“

Бугарија ќе земе учество овој петок на средба на Европската унија, посветена на изградбата на таканаречен „ѕид од дронови“. Веста ја потврди портпаролот на Европската комисија, Тома Рение, пренесе БГНЕС.

„Средбата, посветена на изградбата на „ѕид од дронови“, е закажана за овој петок. На неа ќе учествуваат седумте земји-членки од источниот фланг – Естонија, Латвија, Финска, Литванија, Полска, Романија и Бугарија. Кон овие седум земји можам да ја додадам и Украина“, изјави Рение.

Тој потсети дека уште во говорот за состојбата на Унијата, претседателката на Европската комисија Урсула фон дер Лајен ја нагласи потребата од воспоставување на ваков вид заштита.

„Мислењето на земјите-членки останува водечко во врска со ова прашање. Ќе видиме какви се нивните интереси и како можеме да им помогнеме. Ќе се разгледаат нивните капацитети и потреби, а по дискусијата ќе бидат утврдени потенцијални нови чекори заедно со овие седум земји, Украина и останатите членки на ЕУ“, додаде портпаролот.