Бујар Османи ја претстави стратегијата „Smart Parking“ за решавање на проблемот со паркирањето во Чаир

Паркирањето е број еден проблем за граѓаните на Чаир, изјави Бујар Османи, претставувајќи ја својата нова стратегија „Smart Parking“, која, како што рече, има цел да донесе ред, а не хаос во општината.

Според планот, стратегијата предвидува три нивоа на реализација:

• Краткорочно, решавање на најкритичните точки за паркирање;
• Среднорочно, изградба на нови подземни гаражи со над 2.500 места;
• Долгорочно, спроведување на визијата „Чаир 2040“, која вклучува целосна урбанизација на општината.

Османи најави изградба на 1.000 паркинг-места на булевар „Џон Кенеди“, како и 500 места во Стариот Чаир, а дополнително се планираат и подземни гаражи на локациите „Методија Митевски“, Саат Кула, „Лирија“ и плоштад „Скендербег“.

„Секое маало ќе има сопствени паркинг-зони за жителите, без уништување на зеленилото и јавниот простор,“ истакна Османи, додавајќи дека неговата обврска е „да му ги врати редот и достоинството на Чаир“.

Тој потенцираше дека ова не е само ветување на хартија, туку конкретен план кој треба да донесе нов лик и подобри услови за жителите на општината.