Бугарија одбележува 70 години во УНЕСКО со форум за заштита на културното наследство
Форум посветен на културното наследство и на 70-годишнината од членството на Бугарија во УНЕСКО ќе се одржи на 16 ноември 2026 година во салата „Зимска градина“ на ИЕФЕМ при Бугарската академија на науките (БАН), соопшти Институтот.
Настанот на тема „70 години Бугарија во УНЕСКО: културно наследство, локални заедници, експертиза, културни политики“ го организира ИЕФЕМ – БАН, под покровителство на Националната комисија за УНЕСКО на Република Бугарија.
Целта е да се отвори дискусија за состојбата на бугарските локалитети, артефакти и елементи на културното наследство впишани или препознаени во рамките на УНЕСКО. Учесниците ќе разговараат за проблемите, успешните практики и предизвиците во нивната заштита, како и за учеството на сите засегнати страни во овие процеси.
Посебен акцент ќе биде ставен врз улогата на научниците и експертите како посредници меѓу научните сознанија, институционалните механизми за заштита на наследството и потребите на локалните заедници.
Ќе се разгледуваат и создавањето и спроведувањето културни политики насочени кон зачувување, промоција и одржлив развој на културното наследство како „жив ресурс на идентитет, знаење и меморија на заедницата“, наведуваат организаторите.
Дописната членка на БАН, професорката Мила Сантова, ќе говори за визијата на УНЕСКО за заштита на културното наследство според конвенциите од 1972, 2003 и 2005 година.
Професорот Иван Кабаков од Софискиот универзитет „Св. Климент Охридски“ ќе ја претстави темата „Професии во областа на културното наследство“.
Доцентот д-р Иво Топалилов од ИБЦТ – БАН и Американскиот универзитет во Бугарија ќе говори за изложувањето и приближувањето на археолошките локалитети до јавноста, со осврт на добрите и лошите практики во Бугарија.
