Бугарија со историско сребро на Светското првенство во одбојка во Манила

Националниот тим на Бугарија го загуби второто финале на Светско првенство за мажи во својата историја. 55 години по поразот од ГДР (2:3) во Софија, „лавовите“ овојпат паднаа со 1:3 сета (21:25, 17:25, 25:17, 10:25) од Италија во Манила, Филипини.

Финалето се одигра пред 15.682 гледачи во салата Mall of Asia. Бугарија влезе во решавачкиот меч како единствена непоразена селекција, со импресивна серија против Германија, Словенија, Чиле, Португалија, САД и Чешка. Италијанците имаа само еден пораз – од Белгија во групната фаза.

Во првиот сет Бугарија имаше шанса при водство 14:12, но серија на Италија донесе пресврт и крајни 21:25. Вториот сет беше целосна доминација на противникот, предводен од дијагоналот Јури Романо, кој со сервис-серија обезбеди 25:17.

Третиот сет донесе надеж – „лавовите“ се вратија со 25:17, но во четвртиот беа прегазени од сервисите на Матија Ботоло, кој направи седум поени по ред и го затвори мечот со 25:10.

Без изненадување, најдобар реализатор за Бугарија беше Александар Николов со 23 поени.

Полска го освои третото место на Светското првенство во Манила, а со постигнатиот резултат Бугарија направи скок на деветтата позиција во светската ранг-листа. Италија останува на второто место, додека Германија – една од жртвите на Бугарија – испаѓа од ТОП 10.

Состави:

• Бугарија: Симеон Николов, Аспарух Аспарухов, Александър Николов, Мартин Атанасов, Алекс Грозданов, Илија Петков, Дамјан Колев (либеро)
• Италија: Симоне Џанели, Јури Романо, Алесандро Микиелето, Матија Ботоло, Роберто Русо, Симоне Анцани, Фабио Балазо (либеро)