Бугарија со национален штанд на јубилејната „Зелена недела“ во Берлин

Министерот за земјоделство и храна на Бугарија д-р Георги Тахов официјално го отвори бугарскиот национален штанд на меѓународниот саем „Зелена недела“ во Берлин, каде Бугарија учествува по 35-ти пат. Оваа година саемот се одржува од 16 до 25 јануари и ја одбележува својата 100-годишнина, јавува БГНЕС.

Националниот штанд, со површина од 140 квадратни метри, претставува 15 бугарски производители со млечни производи, производи од месо, вина, мед, биохрана, розово масло, етерични и ладно цедени масла, ароматични води и природна козметика.

Штандот беше посетен од федералниот германски министер Алоис Рајнер, како и од низа високи европски и германски официјални претставници.

Д-р Тахов нагласи дека учеството на Бугарија на јубилејното издание е значајна можност за зајакнување на позицијата на земјата како сигурен и конкурентен агрохранителен партнер.

„Зелена недела“ традиционално собира стотици илјади посетители и изложувачи од целиот свет, а годинава е домаќин и на Глобалниот форум за храна и земјоделство со учество на делегати од над 70 држави.