Бугарија, Турција, Азербејџан и Грузија подготвуваат договор за зелена електрична енергија

Бугарија, Турција, Азербејџан и Грузија во ноември би можеле да потпишат меѓувладин договор за прекуграничен пренос и трговија со електрична енергија произведена од обновливи извори, изјави турскиот министер за енергетика и природни ресурси Алпарслан Бајрактар на Азербејџанско-турскиот енергетски форум во Баку, јавува БГНЕС.

Според Бајрактар, договорот би можел да биде потпишан во рамки на 31. Конференција на страните на Рамковната конвенција на Обединетите нации за климатски промени, која во ноември ќе се одржи во Анталија.

Проектот ги поврзува Бугарија, Турција, Азербејџан и Грузија, а турскиот министер го опиша како „Трансанадолски гасовод за електрична енергија“, по аналогија со Трансанадолскиот гасовод за природен гас.

Бајрактар нагласи дека иницијативата не треба да се гледа само како инфраструктурен проект, туку и како стратешки чекор кон долгорочна регионална енергетска соработка заснована на заемна корист.

„Сакаме овој важен проект што е можно поскоро да го придвижиме во следната фаза“, изјави Бајрактар.

Тој посочи дека во Анталија проектот би можел да премине во следната фаза со потпишување меѓувладин договор од страна на шефовите на државите или надлежните министри на четирите земји.

Според турскиот министер, растечкото значење на електрификацијата во глобалната енергетска агенда дополнително ја зголемува важноста на проектот за Турција и Азербејџан.

Тој оцени дека инфраструктурата и стратешката географска положба на Турција ја претвориле земјата во еден од клучните енергетски центри во регионот.

Бајрактар рече дека Турција ја диверзифицира регионалната енергетска инфраструктура преку изградба на интерконективни електроенергетски врски и реализација на нови проекти.

Според него, овие активности придонесуваат за енергетската безбедност не само на Турција и Азербејџан, туку и на поширокиот регион, вклучително и Европа.

„Веруваме дека секој нов чекор што го преземаме во енергетскиот сектор дополнително ги зближува нашите држави“, изјави Бајрактар.

Тој додаде дека енергетската соработка ќе продолжи да придонесува за заедничкиот просперитет на двете земји и за регионалниот развој.

Бајрактар соопшти и дека се завршени првичните истражувања за планираната интерконективна електроенергетска врска меѓу Турција и Нахичеванската Автономна Република во Азербејџан.

Техничките анализи го утврдиле најсоодветниот модел за реализација на врската, а операторите на електроенергетските системи спроведуваат дополнителни испитувања за нејзината техничка и економска изводливост.

Бајрактар не наведе рок за изградба на интерконекцијата.

Според него, новата врска ќе ја зголеми сигурноста во снабдувањето со електрична енергија и дополнително ќе ја продлабочи енергетската соработка меѓу Турција и Азербејџан.

Поврзувањето на електроенергетските системи, како што рече, може да ја зајакне сигурноста на снабдувањето, да го подобри користењето на ресурсите, да овозможи поголема интеграција на електричната енергија од обновливи извори и да ги прошири можностите за прекугранична трговија.

Бајрактар истакна дека соработката меѓу Турција и Азербејџан веќе не е ограничена само на нафтата и природниот гас, туку ги опфаќа и рударството, обновливите извори на енергија, енергетската ефикасност, пазарите на електрична енергија, како и преносот и дистрибуцијата на електрична енергија.