Бугарската претседателка Илијана Јотова разговараше со кинескиот министер за надворешни работи Ванг Ји за продлабочување на соработката меѓу Бугарија и Кина
Перспективите за зајакнување на билатералната соработка меѓу Бугарија и Народна Република Кина беа тема на средбата во претседателската институција меѓу претседателката Илијана Јотова и министерот за надворешни работи на Кина, Ванг Ји, соопштија од прес-службата на шефицата на државата, пренесува БНТ.
За време на разговорот, претседателката Јотова ги истакна долгогодишните партнерски врски меѓу двете земји, изградени врз основа на заемна доверба и пријателство. Заеднички беше ставот дека заедничката декларација за подигнување на билатералните односи на ниво на стратешко партнерство, потпишана од претседателите Румен Радев и Си Џинпинг во 2019 година, дала позитивен поттик за развојот на билатералните односи. Илијана Јотова и Ванг Ји ги посочија перспективите за продлабочување на соработката во повеќе области, меѓу кои економијата, трговијата, образованието и културата.
Кинескиот министер за надворешни работи ја оцени средбата со претседателката како јасен показател за нивото на пријателство меѓу двете земји. Според Ванг Ји, формирањето редовна бугарска влада по парламентарните избори во април претставува стабилна основа за продлабочување на стратешкото партнерство меѓу Бугарија и Кина, како и за побрзо спроведување на веќе започнатите заеднички проекти. Дипломатот ѝ се заблагодари на Илијана Јотова за нејзината доследна поддршка за развојот на бугарско-кинеските односи.
Шефицата на државата го отвори прашањето за воспоставување директна авиолинија меѓу Софија и Пекинг, што, според неа, ќе создаде можност за подобрување на деловните контакти и културните врски меѓу двата народа. Од бугарска страна беше изразена надеж дека домашните земјоделски производи ќе добијат полесен пристап до кинескиот пазар.
Меѓу главните теми на разговорот на „Дондуков“ 2 беа конфликтите на Блискиот Исток и во Украина, при што двете страни се согласија дека за нивно решавање се потребни активни дипломатски напори.
„Живееме во време со најмногу конфликти по Втората светска војна. На денешниот свет му се потребни повеќе доверба и одговорност. Треба на нашите деца да им оставиме безбеден свет во кој ќе можат да го развиваат својот потенцијал“, изјави Илијана Јотова. Таа го нагласи негативното влијание на војните врз економиите и социјалните системи на земјите.
Кинескиот министер за надворешни работи, Ванг Ји, го истакна обраќањето на бугарската претседателка на 81. сесија на Генералното собрание на ОН во Њујорк во септември, чиј акцент беше ставен на мирот и напорите на државите преку дијалог да ги надминат разликите.
