Бугарскиот истражувачки брод „Св. Св. Кирил и Методиј“ достави опрема за шпанска база на Антарктикот

Бугарскиот научноистражувачки брод „Св. Св. Кирил и Методиј“ ја посети шпанската антарктичка база „Габриел де Кастиља“, лоцирана на вулканскиот остров Дисепшн, со цел да достави материјали за изградба на нова лабораторија, јавува БТА.

Екипажот на бродот, заедно со персоналот на базата, реализираше товарно-растоварна операција за истовар на опремата, натоварена во Картахена, Шпанија. Испораката вклучуваше материјали за нова научноистражувачка лабораторија и мобилен дизел-генератор за нејзино електроснабдување.

Паралелно со тоа, беа обезбедени услови за земање теренски примероци во рамки на научни проекти на истражувачи од Црна Гора и Романија. По завршувањето на заедничките активности, се одржаа взаемни посети меѓу екипажот на НИК 421 и персоналот на шпанската база.

Бродот „Св. Св. Кирил и Методиј“ продолжува да ја поддржува научноистражувачката работа како дел од 34-та бугарска антарктичка експедиција на островот Ливингстон.