Деца од Цариброд, Босилеград и Врање на еко камп во Банско по иницијатива на здружението „ГЛАС“

Од 8 до 10 ноември во Банско ќе се одржи еко камп, кој претставува завршен настан на проектот „Зелено и одржливо“, поддржан од програмата „Бугарска помош за развој“, јавува БНР.

Проектот, што започна кон крајот на минатата учебна година со учество на ученици од три училишта од Босилеград, Врање и Цариброд, има за цел да изгради знаења и вештини во областа на екологијата и одржливиот развој кај младите од Србија. На тој начин се поттикнува одржлив еколошки и социо-економски развој меѓу општините вклучени во иницијативата.

Во текот на изминатите месеци, во секое од училиштата се одржаа по десет предавања на еко-теми. За време на летниот распуст беа распишани конкурси за есеј, цртеж и фотографија поврзани со тематиката на проектот. Како награда, од секое од трите училишта беа избрани по десет најуспешни ученици, кои ќе имаат можност да се запознаат и да ги надградат своите знаења во оваа област на претстојниот еко камп во Банско, информираат од здружението „ГЛАС“ во Босилеград.

Проектот „Зелено и одржливо“ се реализира во партнерство со гимназијата „Св. Св. Кирил и Методиј“ од Цариброд, Хемиско-технолошката стручна гимназија од Врање и гимназијата во Босилеград.