ДИК: До 18:30 часот излезноста изнесува 46, 65 проценти
Државната изборна комисија (ДИК) соопшти дека според податоците добиени до 18:30 часот, излезноста на гласачите на ниво на целата држава изнесува 97,15% обработени избирачки места, односно 3380 од вкупно 3474. Податоците покажуваат различна излезност по општини, со значителни разлики помеѓу урбаните и руралните средини.
Највисока излезност е забележана во Новаци (73,7%), Дојран (72,44%), Лозово (71,98%), Росоман (71,75%) и Чашка (71,63%), каде што повеќе од две третини од гласачите го оствариле своето право на глас. Стабилна излезност од 60 до 70 проценти има и во Могила (69,04%), Македонски Брод (67,49%), Демир Капија (66,51%), Крушево (65,6%) и Пробиштип (65,75%).
Во поголемите градови излезноста е нешто пониска. Во Скопје, таа се движи од 45,57% во Аеродром, 49,92% во Карпош, 49,26% во Центар, 45,09% во Ѓорче Петров, до 46,25% во Кисела Вода. Слична состојба има и во другите урбани општини како Битола (45,76%), Куманово (44,84%), Прилеп (45,34%), Охрид (48,22%) и Штип (48,95%).
Најниска излезност е регистрирана во Центар Жупа (21,3%), Маврово и Ростуша (28,58%), Шуто Оризари (35,33%), Пласница (35,54%), Боговиње (36,4%) и Гостивар (32,38%). Според ДИК, дел од причините за нискиот одѕив во овие средини се поврзуваат со иселувањето и големиот број гласачи кои се во странство.
ДИК најави дека по комплетирањето на обработката на сите избирачки места ќе ги објави конечните податоци за излезноста и деталниот преглед по општини.
