ЕУ комесар: Со целосното приклучување на Романија и Бугарија кон Шенген, Европа создаде отворен пат од Атлантикот до Црното Море

Европскиот комесар за внатрешни работи и миграција, Магнус Брунер, изјави дека со целосното приклучување на Романија и Бугарија кон Шенген-зоната на 1 јануари 2025 година, Европската унија создала отворен пат од Атлантскиот океан до Црното Море. Изјавата ја даде во интервју за романската новинска агенција „Аџерпрес“, пренесува БГНЕС.

„Шенген е едно од најопипливите достигнувања на Европската унија. Тој влијае на животот на повеќе од 450 милиони Европејци — на конкретни начини, како поттикнување на туризмот, намалување на цените и отворање можности за работа и студирање. Но и на посимболичен начин – тој означи нова ера на отвореност во Европа. Со целосното приклучување на Романија и Бугарија, создадовме континентален пат без граници – од Атлантикот до Црното Море“, изјави Брунер.

Меѓу придобивките за Романија од приклучувањето кон зоната без внатрешни граници, комесарот го истакна очекуваниот раст на БДП од околу 2% годишно, благодарение на укинувањето на граничните контроли за патниот транспорт.

Брунер потврди дека Европската комисија моментално ја спроведува првата Шенгенска евалуација на Романија, при што се анализираат области како визна политика и управување со надворешните граници.

Тој исто така се осврна на Европскиот систем за влез/излез (EES) – новата дигитална основа за европското управување со границите, чија целосна имплементација се очекува до април 2026 година, вклучително и на граничните премини во Романија.

Зборувајќи за времените внатрешни контроли во рамки на Шенген, Брунер објасни дека Унијата настојува да воспостави рамнотежа меѓу слободното движење и безбедносните потреби. Во интервјуто беа допрени и теми поврзани со Пактот за миграција и азил, како и со новите европски мерки за враќање на мигрантите.