Европската комисија ѝ исплати 896 милиони евра на Бугарија од Механизмот за закрепнување и отпорност
Европската комисија ѝ исплати 896 милиони евра на Бугарија во рамките на четвртата исплата од Механизмот за закрепнување и отпорност, откако земјата исполнила значителен дел од договорените реформи и инвестиции. Исплатата е дел од вкупно повеќе од 1,86 милијарди евра што Европската комисија денеска им ги префрли на Белгија, Бугарија, Данска и Словенија во рамките на програмата NextGenerationEU, пишува 24 часа.
Средствата за Бугарија се поврзани со четвртото барање за исплата, поднесено на 2 април 2026 година, во вкупна вредност од 1,1 милијарда евра. Барањето беше делумно одобрено од Европската комисија на 18 јуни, а по позитивното мислење на Советот на Европската Унија, средствата сега се исплатени.
Според Европската комисија, Бугарија постигнала напредок во спроведувањето на повеќе клучни реформи и инвестиции. Меѓу нив се мерките за зајакнување на владеењето на правото и подобрување на деловното опкружување, вклучително и формирањето политички и финансиски независна Комисија за спречување на корупцијата и воведувањето правила за регулирање на лобистичките активности.
Меѓу постигнатите резултати е и проширувањето на употребата на обновливи извори на енергија, преку поддршка на речиси 1.400 домаќинства за поставување соларни системи за топла вода или фотоволтаични инсталации.
Европската комисија констатира и напредок во развојот на одржлива транспортна инфраструктура преку склучување нови договори за јавни железнички услуги, како и преку законски измени со кои се поттикнуваат електричната мобилност и воспоставувањето зони со ниски емисии.
И покрај извршената исплата, Бугарија сè уште нема да го добие целиот износ од четвртото барање. Европската комисија наведува дека земјата треба да исполни уште три клучни обврски: усвојување на законодавството за јавниот транспорт, спроведување на реформите во секторот за водоснабдување и канализација и исполнување на целите поврзани со поддршката на културниот сектор.
По исполнувањето на овие услови, Комисијата ќе го разгледа исплаќањето на преостанатите средства.
Со денешната исплата, Бугарија веќе искористила 68 отсто од вкупните средства предвидени со Националниот план за закрепнување и отпорност, чија вредност изнесува 6,17 милијарди евра.
Покрај Бугарија, Европската комисија изврши исплати и за уште три земји членки. Од Европската комисија потсетуваат дека Механизмот за закрепнување и отпорност целосно се заснова на принципот „исплата според постигнати резултати“. Тоа значи дека земјите членки добиваат средства само откако ќе ги исполнат реформите и инвестициите договорени со Брисел.
Сите проекти од националните планови треба да бидат завршени до 31 август 2026 година. Барањата за исплата треба да бидат поднесени најдоцна до 30 септември 2026 година, а конечните исплати во рамките на програмата треба да бидат извршени до 31 декември 2026 година.
