ExcellCity собра над 150 учесници од Бугарија, Северна Македонија, Италија, Шпанија и Турција на завршна конференција во Софија
Над 150 учесници од Бугарија, Италија, Шпанија, Северна Македонија и Турција беа дел од завршната конференција на меѓународниот проект ExcellCity, одржана на 11 мај 2026 година во Софија, јавува БТА.
На настанот присуствуваа претставници на универзитети, научни организации, технолошки компании, студенти и експерти од областа на паметните градови, Интернет на нештата (IoT), вештачката интелигенција и дигиталните иновации.
Проектот ExcellCity, финансиран преку програмата NextGenerationEU и Националниот план за обнова и отпорност, има цел да го зајакне научниот и иновацискиот капацитет во развојот на технологии за паметни градови преку меѓународна соработка и размена на знаења.
Во рамки на проектот беа реализирани летни и зимски школи, обуки, меѓународни мобилности и заеднички научноистражувачки активности. Повеќе од 200 учесници поминале низ програмите на ExcellCity, а објавени се над 20 научни трудови.
За време на конференцијата беа презентирани резултатите од петте работни пакети, како и FIWARE-базираната дигитална инфраструктура за интелигентен универзитетски кампус. Беа демонстрирани решенија за управување со IoT уреди, мониторинг на енергетска ефикасност, интелигентни училници и системи за анализа на податоци во реално време.
Организаторите истакнаа дека ExcellCity поставил одржлива основа за идни меѓународни партнерства, нови научни проекти и развој на иновативен екосистем во областа на паметните градови и дигиталните технологии.
