Изложбата „Национално/локално“ на Уметничката галерија во Казанл’к е поставена во БКИЦ-Скопје

Изложбата „Национално/локално“ на уметничката галерија во Казанл’к беше отворена синоќа во галеријата на Бугарскиот културно-информативен центар во Скопје, јавува БТА.

Симболиката на изложбата, која љубителите на уметноста во главниот град на Северна Македонија ќе можат да ја посетат до крајот на април, е и во тоа што со неа Ликовната галерија – Казанлак ја одбележува својата 125-та годишнина.

„Колекцијата на Уметничката галерија во Казанл’к е втората по старост колекција во земјата, која брои над 5 илјади дела и без неа не може да се прикаже и раскаже историјата на бугарската уметност. Поради специфичностите на Казанл’к, таму се родени над 100 сликари и ако се обидеме да направиме топ 20 на бугарските уметници, најмалку пет од нив се родени во Казанл’к. Во оваа селекција може да видите дела од Дечко Узунов и Ненко Балабански. При селекцијата на изложбата инсистиравме да прикажеме не само дела на автори од градот. Прикажуваме работи не само од уметници кои веќе не се меѓу нас, туку и од автори кои активно творат денес“, истакна на отворањето на „Национално/локално“ директорот на галеријата во Казанл’к, Пламен Петров.

„Оваа изложба претставува еден мал расказ за бугарската ликовна уметност во последните 100 години“, изјави амбасадорот на Бугарија во Северна Македонија, Желјазко Радуков.

Во селекцијата претставена во Скопје може да се проследи континуитетот во бугарската уметност преку делата на автори од различни генерации – од класичните остварувања на Христо Кутев, преку значајното присуство на Дечко Узунов и Ненко Балкански, до експресивниот јазик на Константин Трингов и Стојан Домусчиев. Особено место во повеќеслојната слика за развојот на бугарската ликовна форма, изградена во изложбата, заземаат и делата на Георги Борисов – Лавот, Велемир Петров и Румен Петков, како и на Димитриос Пападакис, Румен Нечев и Дарина и Андреј Јаневи. Акцент се и гоблените на Мара Јосифова.