Карастојанова: „Евровизија“ треба да биде почеток на ново позиционирање на Бугарија

„Евровизија 2027“ во Бургас е можност за ново позиционирање на Бугарија, подобрување на сообраќајната поврзаност и промовирање на земјата како целогодишна туристичка дестинација, изјави извршната директорка на Националниот одбор за туризам, Полина Карастојанова, јавува БНТ.

Според неа, натпреварот не треба да се гледа само како тридневен музички настан, туку како „фактор што ја менува средината и процесите потоа“. Подготовките треба да опфатат подобрување на патната и воздушната поврзаност, туристичката логистика и инфраструктурата на Црноморското Крајбрежје.

Карастојанова посочи дека гостите се очекува да пристигнуваат преку Бургас, Софија и Варна, поради што е неопходно подобро поврзување меѓу главните градови и туристичките региони. Таа ја нагласи потребата од подобрување на автопатот „Тракија“ и врската со северниот дел на Црноморското Крајбрежје.

„Поврзаноста е крвотокот на туристичкиот бизнис“, рече Карастојанова, додавајќи дека Бугарија треба да ги развива морскиот, планинскиот, културниот, винскиот, кулинарскиот и бањскиот туризам во текот на целата година.