Маричиќ: Очекуваме од Софија подготвеност за преговори

„Еврокомесарот за проширување и соседска политика Оливер Вархели е во комуникација со лидерите во Софија и Скопје и работи на надминување на застојот меѓу двете земји од почетокот на кампањата во Бугарија за третите парламентарни и претседателски избори“, вели министерот за правда Бојан Маричиќ во интервју за МИА, пренесува БГНЕС.

„Нашата работа е да направиме се што е можно заедно со европските партнери за да дојдеме до решение, нашата цел е тоа да го направиме што е можно поскоро, дури и за време на словенечкото претседателство“, нагласува Маричиќ.

Според него, рано е да се каже како би изгледал компромисот со Бугарија, бидејќи овој процес мора да се заврши.

„За нас е многу важно да ги почитуваме европските принципи и вредности, меѓусебното почитување и заштита на идентитетот, јазикот и правото на самоопределување“, рече Маричиќ, додавајќи дека има неколку точки во однос на кои може да се направат конкретни работи пред крајот на годината и што можат да придонесат за укинување на ветото, но дека „сето тоа бара партнерство од Софија и нивна подготвеност да влезат во преговори за оние прашања што веќе беа отворени пред кампањата“.

„Мислам дека премиерот ги посочи точките за кои разговарал со претседателот Радев и кои се поврзани со третирањето на некои историски епизоди по, за време и пред Втората светска војна – точки кои не обединуваат или за кои имаме различни позиции. Но и точки за зголемување на економската соработка, подобрување на инфраструктурата“.

„Немаме нереални надежи, но наша должност е да влеземе во овој процес како влада за да го извлечеме максимумот од него“, рече Маричиќ.