МЗ: Голем е интересот за вакцинацијата против сезонскиот грип

Министерството за здравство соопшти дека интересот за вакцинација против сезонски грип бележи постојан пораст. Според официјалните податоци, досега се пријавени повеќе од 70 илјади граѓани, а вакцинирани се над 22 илјади лица ширум државата.

Вакцинацијата се одвива на 35 пунктoви за вакцинација, од кои пет се наоѓаат во Скопје. Заинтересираните граѓани можат да закажат термин преку платформата vakcinacija.mk или преку својот матичен лекар.

Според Министерството, бесплатната вакцинација ги опфаќа ризичните категории население:
лица постари од 65 години, пациенти со хронични заболувања, здравствени работници, бремени жени, деца на возраст од 6 месеци до 5 години, како и лица сместени во установи за социјална заштита и нивните вработени.

Во рамките на организацијата на Министерството, превентивни тимови од здравствените установи продолжуваат со теренска вакцинација. Тие ги посетуваат домовите на повозрасни, неподвижни лица и лица со попреченост, за да им овозможат заштита и во домашни услови.

„Интересот за вакцинација континуирано расте,“ информираат од Министерството, додавајќи дека акцијата ќе продолжи се додека има интерес и достапни вакцини.