На денешен ден во 1981 година е лансиран првиот бугарски вештачки сателит

На денешен ден во 1981 година, точно во 13:35 часот, од космодромот Плесецк со ракетата „Восток-2М“ беше лансиран првиот бугарски вештачки сателит „Интеркосмос-Бугарија-1300“, познат и како „Интеркосмос 22“ или „ИК-Б-1300“, пишува Actualno.

Вселенскиот апарат бил проектиран и изграден од Централната лабораторија за вселенски истражувања при Бугарската академија на науките (БАН), во рамките на програмата „Бугарија-1300“, посветена на одбележувањето 1.300 години од создавањето на бугарската држава.

Лансирањето било дел од меѓународната советска вселенска програма „Интеркосмос“. Во рамките на „Бугарија-1300“ бил изграден и втор вселенски апарат – „Метеор-Природа“, кој бил лансиран подоцна истата година.

„Интеркосмос-Бугарија-1300“ бил создаден врз основа на советската платформа за метеоролошки сателити „Метеор“ на ВНИИЕМ.

Од бугарска страна во создавањето на апаратот учествувале директорите и научните раководители Ст. Чапк’нов, И. Кутиев и М. Гогошев, додека од партнерскиот Институт за вселенски истражувања при Руската академија на науките учествувал В. Адаско.

Сателитот тежел 1.500 килограми и бил опремен со 12 инструменти. Единаесет од нив биле наменети за истражување и мерење на зрачења и наелектризирани честички, а апаратот располагал и со ласерски рефлектор за геодетски мерења и определување на неговата положба.

Специјален проводлив материјал во обвивката на сателитот овозможувал прецизни мерења на електричните полиња и нискоенергетската плазма. Електрониката била сместена во херметизиран и температурно регулиран простор.

Два соларни панели обезбедувале моќност од два киловати и ја полнеле акумулаторската батерија, која го снабдувала апаратот со енергија за време на периодите кога бил во сенка.

За складирање на собраните информации биле предвидени два магнетофони со капацитет од по 60 мегабити.

Научната програма на сателитот траела вкупно 18 месеци. Во тој период бугарската страна добила 750 сесии со податоци.

Првата сесија со податоци, со број 91, била примена на 13 август 1981 година, а последната, со број 7893, на 16 февруари 1983 година.

Податоците биле обработувани во Централната лабораторија за вселенски истражувања при БАН, а дел од нив подоцна биле и дигитализирани.