Над 300 учесници од 10 земји на фестивал на бугарски фолклорни состави во Бургас

Над 300 учесници од 21 фолклорна формација од 10 земји ќе настапат на второто издание на Фестивалот на бугарските фолклорни состави од странство „Бургас нè собира“, што ќе се одржи од 18 до 20 септември во Бургас, јавува БНР.

Во трите фестивалски дена танчари, пејачи и музичари од Австрија, Германија, Италија, Шпанија, Велика Британија, Франција, Норвешка, Молдавија, Швајцарија и Кипар ќе го претстават бугарскиот фолклор и традиции.

Официјалното отворање е на 18 септември од 19:30 часот во Летниот театар во Бургас. Програмата предвидува три концерти, дефиле и заедничко бугарско оро.

Фестивалот ќе заврши на 20 септември со дефиле од 17:30 часот и гала-концерт на сите формации од 19:30 часот во Летниот театар, каде што ќе бидат доделени и признанија на истакнатите состави и изведувачи.

Организатори се Асоцијацијата на бугарските фолклорни состави во странство и проектот „Поштенска кутија за приказни“, со поддршка од Општина Бургас и Извршната агенција за Бугарите во странство.