Пенчо Семов – првиот бугарски милијардер чиј имот бил национализиран по 1944 година

Пенчо Семов, познат како „бугарскиот Рокфелер“, оставил богатство од над 1 милијарда лева во моментот на неговата смрт во 1945 г., во тоа време таа сума изнесувала повеќе од 9 милиони долари. Неговиот капитал вклучувал фабрики, акции, пари и техничка база во повеќе индустрии, пишува неделникот 168 часа.

Роден во габровското село Цветковци, Семов од сиромашно момче, станал еден од најбогатите индустријалци во Бугарија. И покрај личните трагедии – загубата на првата сопруга и двете деца од туберкулоза – тој инвестирал во добротворни цели, вклучително и изградба на белодробна болница и фонд за борба против болеста.

Историчарката Красимира Чолакова наведува дека една од неговите најзначајни градби – вилата „Ефорија“ во Габрово, наменета како старечки дом, денес се реставрира. Според неа: „До чешмата секогаш држел кутија со трибојни локумчиња – бело, зелено и црвено, за луѓето да се напијат вода и да паметат дека се Бугари.“

Семов бил акционер во 28 компании, меѓу кои банки и осигурителни друштва, во неговите фирми работеле околу 15.000 луѓе. Тој донирал значајни средства, вклучително и 300.000 златни лева за дипломатски напори по Првата светска војна во корист на Бугарија.

По 9 септември 1944 година, неговиот имот бил целосно национализиран од комунистите, а неговата фондација била укината. Иако бил предупредуван за претстојните промени, Семов верувал: „Може да ни ги земат фабриките, ама ќе нè остават да работиме во нив.“

Тој умира во почетокот на 1945 година, без да го види уништувањето на своето стопанско наследство.