ПРЕЗЕМЕНИ АКТИВНОСТИ ЗА РАСЧИСТУВАЊЕ НА СЛУЧАЈОТ СО ГРУПАТА „ЈАВНА СОБА“ НА „ТЕЛЕГРАМ“

Министерството за внатрешни работи презема мерки и активности за расчистување на случајот со затворената група „јавна соба“ на социјалната мрежа „Телеграм“ на која се објавувани фотографии со експлицитна содржина.

„Веднаш по добиената пријава преземени се мерки и активности за расчистување на случајот. Секторот за компјутерски криминал и форензика веднаш контактира со мрежата „Телеграм“, со цел добивање на потребните податоци околу функционирањето на оваа група и воедно го известивме за содржините што се објавени“, информира портпаролот на МВР Тони Ангеловски.

Тој додаде дека е известено и Јавното обвинителство и дека се преземаат мерки за расчистување, а воедно апелира до граѓаните да пријават во полицијата злоупотреба на фотографии не само за овој, туку и за кој било друг случај.

Реакции за групата имаше вчера по социјалните мрежи. Според споделените информации на социјалните мрежи дел од фотографиите објавени во оваа затворена група се преземени од отворени профили, а дел биле препраќани преку приватни профили и имале порнографска содржина.

Групата, како што изјави премиерот Оливер Спасовски, е креирана за многу брзо и за многу кратко време има толкав број учесници.

„Според информации што ги добив од Бирото за јавна безбедност покрената е целосна постапка за расчистување на овој случај, известено е јавното обвинителство и заедно се работи на откривање на администраторот, меѓутоа и на членовите на оваа група“, изјави Спасовски во одговор на новинарско прашање на денешната прес – конференција во Владата.

Тој апелира да се заврши што е можно побрзо активноста околу завршување на сите процедури во делот на истрагата и на одговорните што ќе се утврдат да сносат целосна одговорност.

„Ова е апел до сите нас, апел е и до родителите, апел и до образовните институции да имаме надзор над своите деца и да реагираме благовремено и семејствата, но и образовните институции се со цел заеднички да придонесеме да не се случуваат вакви случаи. Имало секако вакви случаи и претходно на кои сме работеле заеднички со Министерството за труд и социјална политика и биле расчистувани навремено, меѓутоа сето ова треба да покажува дека не само репресивниот елемент во откривањето на вакви состојби, туку и многу порано да се работи превентивно и сите заедно да работиме и во семејствата и во институциите“, посочи Спасовски.

Дополнителниот заменик-министер за труд и социјална политика Санела Шкирељ истакна дека се работи координирано со Министерството за внатрешни работи и со Министерството за образование и дека во моментов немаат пријава од родители, но апелираше до сите родители кои имаат информација дека нивните деца биле изложени и биле дел од оваа група да се обратат до центрите за социјални работи.

„Информацијата ја добивме синоќа и веднаш со Министерството за внатрешни работи и МОН се искоординиравме. МВР постапува во делот на истрагата. Јас синоќа упатив апел и сега апелирам до сите родители чии што девојчиња биле изложени на таква содржина во таа група да се обратат до центрите за социјални работи, каде нашите тимови стојат на располагање за психолошка помош, поддршка и советување“, рече Шкриељ.

Според неа доколку се утврди дека и креаторите на групата се малолетници Центарот за социјални работи во соработка со МВР ќе постапува во рамки на своите надлежности, а со МОН, како што додаде, сме координирани и тие ќе постапуваат преку своите стручни тимови што ги имаат во училиштата.