Радев: Египет е стратешки партнер на Бугарија и Европската унија
Египет е партнер од стратешко значење за Бугарија и Европската унија, изјави бугарскиот претседател Румен Радев во интервју за египетската национална информативна агенција MENA, пренесува БГНЕС.
Радев учествуваше на свечената церемонија со која беше официјално отворен Големиот египетски музеј во Гиза, по покана на претседателот на Арапската Република Египет Абдел Фатах ел-Сиси. На настанот присуствуваа државни и владини лидери од целиот свет.
Во музејот се изложени десетици илјади експонати, меѓу кои и илјадници артефакти од гробницата на владетелот Тутанкамон, кои за првпат се прикажуваат на едно место.
Претседателот Радев нагласи дека Големиот египетски музеј ја открива големината на древната египетска цивилизација, култура и традиции. „Како земја наследничка на една од најстарите европски култури, Бугарија целосно го разбира значењето на зачувувањето и претставувањето на богатото историско и културно наследство пред светот,“ изјави бугарскиот претседател.
Тој посочи дека Бугарија и Египет во последните години отвориле ново поглавје во своите односи, со воспоставување на нови механизми за дијалог и партнерство преку заеднички комисии за соработка и економски развој.
Во 2026 година двете земји ќе ја одбележат 100-годишнината од воспоставувањето на дипломатските односи, а Радев изрази надеж дека претседателот ел-Сиси ќе ја посети Бугарија со цел дополнително продлабочување на билатералната соработка.
Бугарскиот претседател истакна дека трговската размена меѓу Бугарија и Египет достигнала 1,8 милијарди американски долари во 2024 година, при што Бугарија е меѓу најзначајните добавувачи на житни производи за египетскиот пазар.
Според Радев, расте и интересот на бугарските компании за инвестиции и заеднички проекти во Египет, што ќе придонесе за натамошно проширување на економската и технолошката соработка меѓу двете земји.
Домаќин на свечената церемонија беше претседателот Абдел Фатах ел-Сиси, кој заедно со сопругата Интисар Амер ги пречека официјалните гости.
На маргините на настанот, Радев имаше разговор со Халед ел-Енани, номиниран од Извршниот совет на УНЕСКО за нов генерален директор на организацијата, кој исто така беше меѓу присутните гости.
