Радев: Во најбрзо време ќе го свикам Народното собрание
Во блиска иднина, кога ќе бидат објавени имињата на пратениците, ќе го свикам Народното собрание. Верувам дека партиите ќе ги надминат разликите во име на заедничката иднина и ќе има стабилно мнозинство. Ова го изјави претседателот Румен Радев, кој присуствуваше на заклетвата на новите уставни судии, јавува БГНЕС.
Радев ги поздрави „Продолжуваме со промената“ за недвосмислениот успех и рече дека резултатите носат шанса и надеж.
„Битката за зајакнување на државата не е завршена. Партиите на статус квото многукратно го изразија својот стремеж да го контролираат и претседателството – никогаш не штеделе ресурси, најмалку ќе ги жалаат и во текот на оваа недела“, изјави шефот на државата, кој во недела е во трка против проф. Анастас Герџиков.
Румен Радев ги повика сите бугарски граѓани кои сакаат да живеат во достоинствена и модерна Бугарија да излезат и да гласаат за промената да биде неповратна.
„Имаме потреба од индивидуална конституционална жалба, таа е воведена во повеќето земји од Европската Унија. Сигурен сум дека тоа ќе ја зголеми довербата на бугарските граѓани во Уставот, во демократијата, во институциите. Тоа е поврзано со промени во Уставот, измени во Законот за Уставниот суд, проширување на неговите овластувања, повеќе ресурси и повеќе кадри“, додаде претседателот.
На прашањето дали ако биде избран за втор мандат, дали конечно ќе го изгласа нацрт-амандманот на Уставот или нов Устав, шефот на државата категорично одговори дека тоа дефинитивно треба да се случи.
