Руте: НАТО високо ги оценува напорите на Романија, Бугарија и Турција за расчистувањето мини во Црното Море

НАТО високо ги оценува напорите на Романија, Бугарија и Турција во Црноморскиот регион за проширување на активностите за расчистување мини и патролирање. Ова го изјави генералниот секретар на НАТО, Марк Руте, на прес-конференција во Букурешт со романскиот претседател Никушор Дан, пренесува БГНЕС.

„Романија обезбедува важно лидерство во контекст на Црноморскиот регион, кој, сакам да нагласам, има стратешко значење за целиот Алијанс“, истакна Руте.

„Во последните месеци сведочевме на руски прекршувања на вашиот воздушен простор со дронови. Реакцијата на НАТО беше брза и решителна. Независно од намерите, НАТО ги сфаќа овие инциденти исклучително сериозно и ќе остане будна. Одвраќањето е основата на нашата одбрана, затоа ние јасно кажуваме дека НАТО е подготвена, решителна и способна да направи сè што е потребно за да заштити“, додаде генералниот секретар.

Руте нагласи дека не смее да постои никакво сомневање во решеноста на НАТО да го брани Алијансот – на копно, море и воздух.

„Тоа, секако, ги вклучува и активностите како Eastern Sentry, кои додаваат сила и флексибилност на нашата одбранбена позиција по целото источнo крило – вклучително и во Црноморскиот регион. Работиме заедно со индустријата за да ги обезбедиме технологиите, артилеријата и муницијата што ни се потребни за да продолжиме да го браниме секој сантиметар од територијата на сојузниците. Во тој контекст, Романија исто така игра важна улога“, истакна Руте.