Самит ЕУ-Западен Балкан: Процесот на проширување треба да се забрза, но да остане заснован на реформи и заслуги

Европската Унија на самитот ЕУ–Западен Балкан во Тиват порача дека процесот на проширување треба да се забрза, но да остане заснован на реформи и заслуги. Во заедничкото соопштение се нагласува дека добрососедските односи, регионалната соработка и усогласувањето со надворешната и безбедносната политика на ЕУ се клучни за напредокот кон членство, јавува БГНЕС.

Претседателката на Европската комисија, Урсула фон дер Лајен, изјави дека проширувањето е „геостратешка неопходност“ и долгорочна инвестиција во мирот, стабилноста и безбедноста на Европа. Таа порача дека процесот мора да стане побрз и подинамичен.

Франција и Германија предложија модел на постепена интеграција на земјите кандидатки во ЕУ. Претседателот на Франција, Емануел Макрон, истакна дека двете земји поддржуваат засилен процес на постепено приближување кон Унијата.

Германскиот канцелар Фридрих Мерц изјави дека Србија треба јасно да ја одреди својата геополитичка ориентација и дека не може да балансира меѓу Русија, Кина и Европа. Српскиот претседател Вучиќ повтори дека членството во ЕУ останува стратешка цел на земјата.

Според Фон дер Лајен, Црна Гора има реални шанси да стане членка на ЕУ до 2028 година, додека Албанија е меѓу најнапредните кандидати во регионот.