Случај „Пулс“ – постапката сè уште не е помината на сите инстанци
Обвинителниот акт за пожарот во кочанската дискотека „Пулс“ сè уште не е одобрен од судот и не ја поминал целосната процедура на оценка. Предметот, кој по одлука на Врховниот суд од Кочани беше префрлен во Основниот кривичен суд – Скопје, моментално е во фаза на разгледување на приговорите поднесени од одбраната, јавува Радио Слободна Европа повикувајќи се на високи извори во Судот.
Според неофицијалните информации, 39 адвокати кои застапуваат 34 обвинети поднеле приговори на обвинителниот акт, а судот чека да истече законскиот рок од осум дена за евентуални приговори испратени по пошта.
До почетокот на судењето остануваат два главни чекори:
- Завршување на фазата на оценка на обвинителниот акт – судскиот совет ќе ги разгледа сите приговори и ќе одлучи дали обвинението ќе биде прифатено во целост, делумно или ќе биде вратено на доработка.
- Подготвително рочиште – прва формална средба на странките на која се утврдуваат доказите и процесните прашања пред почеток на главната расправа.
Дури по завршувањето на овие чекори ќе може да започне главната расправа. Како што посочува Радио Слободна Европа, вакви „мега процеси“ со голем број обвинети, адвокати, сведоци и обемен доказен материјал обично траат долго и често се одложуваат уште пред формалниот старт, особено поради процесни приговори и барања од одбраната.
Обвинителниот акт, поднесен на 13 јуни 2025 година, опфаќа 34 физички и 3 правни лица обвинети за тешки дела против општата сигурност. Во него се наведени над 1.440 материјални докази и искази на 283 сведоци, а како клучен наод обвинителството посочува 13-годишен континуиран ланец на системски пропусти и корупциски дејствија кои довеле до трагедијата во која загинаа 62 лица.
Во меѓувреме, семејствата на жртвите продолжуваат да бараат одговорност и транспарентност. На протестниот марш „Марш на ангелите“ одржан на 27 јули 2025 година, тие побараа од Јавното обвинителство и судот информации за текот на постапката, особено во делот од обвинението кој се однесува на државни и полициски службеници споменати во истрагата.
