Трамп: Средбата со Путин е вовед кон реални преговори за Украина

Американскиот претседател Доналд Трамп изјави дека претстојната средба со рускиот лидер Владимир Путин во Алјаска би можела да пропадне, но ја нарече само вовед кон втора, трилатерална средба на која би се постигнал суштински договор за војната во Украина.

Трамп и Путин ќе одржат разговори на 15 август во американска воздухопловна база во близина на Анкориџ, со цел пронаоѓање решение за конфликтот во Украина. Украинскиот претседател Володимир Зеленски нема да учествува на оваа средба, но Трамп најави дека би можело да има втора средба со сите тројца лидери, доколку првата биде успешна.

„Оваа средба ја подготвува втората. Втората ќе биде многу, многу важна, затоа што таму ќе се постигне договор. Не сакам да ја користам зборот ‘поделба’. Но, знаете, до одреден степен тоа и не е лош термин, нели?“, изјави Трамп за Fox News Radio.

Засилената руска офанзива и исклучувањето на Зеленски од првата средба предизвикаа загриженост во Европа дека Трамп и Путин би можеле да постигнат договор кој ќе ѝ наметне болни отстапки на Украина.

Претходно, Трамп спомена можност за „размена на територии“, но по разговорите со европските лидери на 13 август, изгледа дека го ублажил ставот. Сепак, неговите денешни коментари сугерираат дека оваа опција сè уште не е целосно исклучена.

Трамп додаде дека постои „25% веројатност“ средбата да не биде успешна.