(Видео) Димитар Радев: Бугарија веќе полноправно учествува во одлуките за иднината на еврозоната

Воведувањето на еврото во Бугарија не е само историска пресвртница, туку и резултат на обемна институционална подготовка, координација и соработка, изјави гувернерот на Бугарската народна банка, Димитар Радев, во обраќањето до учесниците на OMFIF Sofia Forum 2026, пренесе БГНЕС.

Според Радев, Бугарија веќе полноправно учествува во Евросистемот и ја споделува одговорноста за одлуките со кои се утврдува заедничката монетарна политика.

Форумот обединува гувернери и претставници на централни банки, европските институции, политичари, инвеститори и лидери од финансискиот сектор, кои разговараат за иднината на европската економија и финансискиот систем.

„За Бугарија ова беше историски момент. Но, би сакал да нагласам нешто помалку церемонијално. Воведувањето на еврото беше и огромна практична задача. Тоа бараше години подготовка, внимателна координација меѓу институциите и тесна соработка со банкарскиот сектор, бизнисот и нашите европски партнери“, изјави Радев.

Според него, најјасен показател за успешноста на преминот е фактот што за повеќето граѓани тој станал природен дел од секојдневието. Целта, како што посочи, била граѓаните непречено и со доверба да продолжат да плаќаат, да ги примаат своите плати и пензии и да ги извршуваат своите деловни активности.

Гувернерот потсети на клучните етапи од економската и институционалната трансформација на Бугарија – воведувањето на валутниот борд во 1997 година, членството во Европската Унија во 2007 година, пристапувањето кон Банкарската унија и Механизмот на девизни курсеви II во 2020 година, како и воведувањето на еврото на 1 јануари годинава.

„Од јануари Бугарската народна банка е полноправна членка на Евросистемот, директно учествува во донесувањето одлуки и носи одговорност за заедничката монетарна политика. Повеќе не се подготвуваме за пристапување. Учествуваме полноправно и ја споделуваме одговорноста за одлуките што ја засегаат целата еврозона“, нагласи Радев.

Тој посочи дека историската перспектива потсетува на значењето на отпорноста и институционалниот континуитет.

„Монетарните режими можат да се менуваат, но потребата од стабилност, сигурни институции и доверба на јавноста останува“, изјави гувернерот.

Според Радев, Европа се соочува со сериозни предизвици поврзани со економската отпорност, конкурентноста, инвестициите и иднината на финансиската архитектура, а ниту една држава не може самостојно да се справи со нив.

Тој изрази надеж дека форумот ќе овозможи размена на ставови и искуства меѓу претставниците на централните банки, европските институции, политичарите и лидерите од финансискиот сектор, нагласувајќи го значењето на соработката за иднината на Европа.