(Видео) Јотова: Очекувам извинување од премиерот и министерот за надворешни работи на РСМ заради случајот со Ковачев

Потпретседателката Илијана Јотова ја дефинира забраната за влез на Андреј Ковачев и уште четворица Бугари во Северна Македонија како „уште една брутална и бескрупулозна демонстрација“, пренесува НОВА.

„До сега не добивме задоволителен одговор од РСМ за тоа кој ја изрекол забраната и какви се овие „црни“ списоци во кои е ставен бугарскиот европратеник. Ова е провокација и за Бугарија и за ЕУ. Европратениците се луѓе кои имаат слободен пристап до сите земји со кои работат“, изјави Јотова пред новинарите. И додаде дека очекува извинување од премиерот и министерот за надворешни работи на РС Македонија.

„Доколку стојат на позициите што повеќепати ги декларирале пред нас, очекувам извинување“, коментира потпретседателката на Бугарија.

Потсетуваме дека, европратеникот Андреј Ковачев, претседателот на фондацијата „Бугарска памет“ Милен Врабевски и уште тројца бугарски државјани на 6 мај не беа пуштени на територијата на РСМ, бидејќи не ги исполнувале условите запишани во Законот за странци во земјата.