Скопје треба да ни се извини за црната листа и да ја отстрани
Пишува: Стефан Стефанов/ Актуелно
Ако навистина постои црна листа со забрана за влез на бугарски политичари во Република Северна Македонија, Скопје не само што официјално треба да ја отстрани, туку и треба да ни се извини. Слична практика можеби е дозволена за некои земји од Третиот свет, но е незамислива за земја која се движи кон Европската унија.
Нормално, амбасадорката на РСМ во нашата земја, Агнеза Поповска, не потврди дека постојат списоци со забрана за влез на Бугари. Така барем изјави таа на средбата со нашиот министер за надворешни работи Иван Кондов. Но, нема друго објаснување зошто на 6 мај не им се дозволи на петте Бугари кои сакаа да се поклонат пред бугарските воени гробишта кај Ново Село. Некако, работите не се вклопуваат и постои сериозна неусогласеност меѓу официјалниот став на Скопје, кој и беше презентиран на Бугарија, и податоците од граничниот систем на нашата соседна земја, и мора да се инсистира на разјаснување на ова прашање.
Постојат две опции. Првата е дека постои црна листа. За истата се зборува од долго време, а кога Ангел Џамбазки не беше пуштен во Македонија, се случи вистински скандал. Но, секако официјална потврда за тоа не може да биде добиена од властите таму. Уште за време на прославата на Гоце Делчев на 4 февруари во македонската престолнина, претседателот на РСМ, Стево Пендаровски, најави дека ќе ѝ предложи на Владата да воведе забрана за влез во државата на еден европратеник од Бугарија и на неколку други бугарски политичари. Неговиот аргумент беше „поради дејствијата што ги преземаат против Скопје“. Само ќе забележиме дека заедно со Џамбазки не му беше дозволен влез и на Андреј Ковачев, кој исто така е европратеник. Нема појасен знак за тоа што мисли Скопје за ЕУ. Потоа, власта во РСМ веројатно се исплаши, бидејќи и кај нас, а и во ЕУ имаше доволно јасни реакции. На крајот излегоа со образложение дека Ковачев бил вратен затоа што бил „во лошо друштво“. Да, веројатно може да има поглупаво оправдување, но истото сè уште не ни е дадено.
Втората опција е да нема официјално спуштена црна листа, туку одредени лица да се враќаат од границата со еднократна инструкција одозгора. Ова е исто така веројатно. Тоа на некој начин објаснува зошто има несогласувања. Во известувањата доставени до бугарските државјани од граничните власти на РСМ, стои дека во граничниот систем на нашата соседна држава се наоѓаат на забранета листа. Официјално Скопје го тврди спротивното. Бугарската држава може повеќе. На пример, нашето Министерство за надворешни работи треба да излезе со став пред европските амбасадори во нашата земја и да инсистира на нивна поддршка. Тешко дека ќе останат индиферентни во однос на овој невиден чин. Напротив, логично е да се очекува силна реакција, бидејќи тоа што се случи воопшто не се совпаѓа со декларираната намера на Скопје да работи за добрососедските односи, а камоли да ги исполни преземените обврски.
Веќе стана јасно дека до европските власти ќе бидат испратени писма од претседателот, претседателот на Националното собрание и министерот за надворешни работи. Тогаш Скопје ќе треба да ни се извини. Веројатно по оваа наша реакција ќе се засили европскиот притисок врз РСМ и по прашањето за тамошните Бугари. А можеби токму заштитата на нивните права ќе стане одлучувачка за движењето на РСМ кон ЕУ. Дури кога Скопје ќе ја тргне оваа црна листа и ќе ни се извини, ќе можеме да продолжиме со разговорите за нивното членство во ЕУ. Но, не и пред тоа.
