(Видео) Откриен споменик на бугарската поетеса Елисавета Багрјана во дворот на 51 СОУ во Софија

Споменик на Елисавета Багрјана беше откриен во дворот на 51 СОУ во бугарскиот главен град Софија, кое го носи името на големата бугарска поетеса.

Монументот е дело на скулпторот Димо Бојчев и е симболичен гест кон творештвото и духот на една од најсаканите и најзначајни бугарски поетеси. Нејзините стихови и денес звучат модерно, слободољубиво и инспиративно.

Оваа година се навршуваат 35 години откако училиштето го носи името на големата бугарска авторка. Споменикот не е само знак на признателност, туку и порака до младите луѓе за силата на зборот, слободата на духот и љубовта кон татковината.

Пред БГНЕС, внуката на поетесата Елисавета Шапкарева изјави дека е силно возбудена, бидејќи ова е првиот споменик на Багрјана.

„Досега имаше само спомен-плоча на зградата во која таа живееше. Ова е првиот споменик и сум многу возбудена и многу благодарна. Тимот на училиштето е прекрасен. Тоа веќе 35 години го носи тоа име и секогаш биле многу активни, секогаш организираат свечености, но оваа иницијатива е исклучителна“, рече Шапкарева.

Таа потсети дека „Човечко срце“ била омилената стихозбирка на нејзината баба, а и самата таа многу ја сака.

Запрашана која порака на Багрјана е најважно да стигне до учениците, Шапкарева ја посочи љубовта кон нејзиното творештво.