(Видео) „Врана“ – живата ботаничка колекција на бугарските цареви
Паркот „Врана“, дел од поранешниот царски дворцов комплекс крај Софија, опфаќа околу 950 декари и содржи повеќе од 400 растителни видови од различни делови на светот, што го прави еден од највредните историски парковски ансамбли во Бугарија, пишува БГНЕС.
Имотот, поранешен чифлик на османлискиот управител Осман Паша, во 1899 година го купил бугарскиот кнез Фердинанд I. Првата дворцова зграда била изградена во 1904 година според проект на архитектот Георги Фингов, а главниот дворец бил подигнат меѓу 1909 и 1912 година по проект на Никола Лазаров.
Благодарение на интересот на Фердинанд I за ботаниката и орнитологијата, во паркот биле засадени бројни ретки и егзотични растенија. Старите дрвја, алеите и отворените простори имаат историска, уметничка и ботаничка вредност.
Во 1998 година Симеон Сакскобурготски го подарил паркот на Општина Софија под услов да биде отворен за јавноста. Парк-музејот „Врана“ е достапен за посетители од 2013 година и има статус на национален споменик на културата.
