Виткоф ќе се сретне со Зеленски утре во Турција

Специјалниот пратеник на САД за мировни мисии, Стив Виткоф, планира да отпатува за Турција на 19 ноември, каде што ќе учествува во разговори со украинскиот претседател Владимир Зеленски, јавува БГНЕС.

Зеленски најави дека ќе ја посети Турција на истиот датум со цел да ги „возобнови преговорите“ за решавање на конфликтот во Украина. Според него, Киев изработил конкретни предлози и решенија кои ќе им ги претстави на меѓународните партнери. Тој истакна и дека Украина се стреми да го обнови процесот за размена на воени заробеници.

Сепак, украинскиот лидер не откри со кого точно ќе се сретне и ќе разговара во Турција.

Мировните преговори стагнираа по трите круга директни средби помеѓу руските и украинските делегации во Истанбул претходно оваа година, кои не резултираа со значаен напредок. Москва ја одби можноста за примирје, го засили напредувањето на фронтот и продолжи со интензивни бомбардирања врз украинските градови.