Во Чикаго беше одбележана 83-та годишнина од спасувањето на бугарските Евреи
На 12 март во Чикаго беше одбележана 83-та годишнина од спасувањето на бугарските Евреи. Настанот беше организиран од Генералниот конзулат на Бугарија во Чикаго, Генералниот конзулат на Израел во Чикаго и Американскиот еврејски комитет во Чикаго.
„За мене беше чест, како генерален конзул на Бугарија во Чикаго, да бидам домаќин на предавањето на проф. Џозеф Бенатов , посветено на 83-годишнината од спасувањето на бугарските Евреи“, напиша во социјалната мрежа Facebook Светослав Станков, генерален конзул на Бугарија во Чикаго.
„Им благодариме на нашите партнери за одличната соработка и за напорите да се зачува и пренесе оваа важна историска меморија“, додава Станков.
„Спасувањето на бугарските Евреи останува уникатен момент во најмрачната глава од еврејската историја. Народни претставници, духовни водачи, интелектуалци и обични граѓани одбија да дозволат депортирање на своите еврејски соседи. Нивната храброст спаси десетици илјади човечки животи.“, истакна во своето обраќање генералниот конзул на Израел во Чикаго, Елад Стромајер.
„Спасувањето на бугарските Евреи за време на Холокаустот е приказна за отпор заснован на морални вредности. Спасителите не го поделија општеството по етничка или религиозна основа – тие застанаа на страната на моралот и правдата.
Осумдесет и три години по Холокаустот не смееме да заборавиме дека во основата на злосторствата од омраза стои говорот на омраза. Затоа треба обединето да се спротивставуваме на секоја форма на нетолеранција.
Наша должност не е само да го разобличуваме злото, туку и да го покажуваме добриот пример. Приказната за спасувањето на бугарските Евреи треба да се споделува со идните генерации како лекција за храброст, солидарност и човечност“, изјави пред присутните генералниот конзул на Бугарија во Чикаго Светослав Станков.
Во својата објава на социјалната мрежа Facebook тој упати благодарност до проф. д-р Џозеф Бенатов за продлабоченото и инспиративно предавање, како и до сите пријатели и партнери кои се приклучиле во одбележувањето.
