Во Црното Море започна меѓународната поморска воена вежба „Посејдон 2026“ под раководство на Бугарија

На 9 ноември започна главниот дел од мултинационалната поморска воена вежба „Посејдон 2026“, организирана и предводена од Военопоморските сили на Бугарија. Вежбата се одржува во бугарските територијални води во Црното Море и ќе трае до 14 ноември, јавува Армимедија.

Целта на вежбата е усовршување на подготвеноста на воениот персонал за планирање и спроведување противмински операции, испитување на плитководни подрачја и уништување неексплодирани убојни средства.

Активностите се спроведуваат според стандардите и процедурите на НАТО, во однапред определени поморски подрачја.

Во вежбата учествуваат екипажи од военопоморските сили на Бугарија и Романија, како и бродови од составот на Црноморската поморска противминска група „MCM BLACK SEA“.

Во штабниот дел учествуваат претставници на военопоморските сили на Белгија, Франција, Холандија, Грција, Турција и Романија, како и на Сојузничката поморска команда на НАТО (MARCOM).

Според организаторите, учеството на групата „MCM BLACK SEA“ придонесува за подобрување на оперативната и тактичката соработка меѓу противминските сили на НАТО на источното крило на Алијансата.

Вежбата „Посејдон“ се организира секоја година од 2002 година, при што раководството наизменично го преземаат военопоморските сили на Бугарија и Романија.

Овогодишната вежба се одржува под раководство на командантот на Флотилата на борбени и помошни бродови на бугарската морнарица.