Во опсерваторијата „Рожен“ пристигна дел од опремата за првиот професионален радиотелескоп во Бугарија

Во Националната астрономска опсерваторија „Рожен“ пристигна дел од опремата за првиот професионален радиотелескоп во Бугарија — LOFAR-BG. Со тоа започнува изградбата на првата станица на системот LOFAR во Југоисточна Европа, јавува Актуално.

„Пристигна контејнерот со компјутерска техника, кој е основен дел од новиот радиоастрономски телескоп што го создаваме — LOFAR-BG“, изјави Камен Козарев, директор на Институтот за астрономија со НАО при БАН.

LOFAR-BG е дел од европската мрежа LOFAR, која вклучува 53 станици низ Европа, меѓу кои и бугарската. Според Козарев, новиот радиотелескоп ќе отвори „нови очи“ за опсерваторијата и за бугарската наука кон Вселената.

Телескопот ќе овозможи набљудување на најниските радиофреквенции што можат да се регистрираат од Земјата. Со него ќе се истражуваат феномени поврзани со сончевата активност, магнетните полиња во нашата галаксија, како и далечни галаксии и активни галактички јадра.

LOFAR-BG ќе биде поставен на поле со големина на фудбалско игралиште, во близина на опсерваторијата. За разлика од класичните радиотелескопи, тој ќе се состои од голем број едноставни антени, чии сигнали ќе се обработуваат во доставениот контејнер, а потоа преку брза оптичка врска ќе се испраќаат до Гронинген, Холандија.

Проектот е дел од националната патна карта за научна инфраструктура на Бугарија. Водечки партнер е Институтот за астрономија, заедно со Техничкиот, Софискиот и Шуменскиот универзитет.

Поставувањето на антените и каблите е планирано во текот на летото и треба да заврши до крајот на август. Во септември се очекуваат тестирања и „прва светлина“ на новиот радиотелескоп, а според НАО „Рожен“, LOFAR-BG треба да започне со работа до крајот на годината.