ЗАПОЧНА ПРИМЕНАТА НА БРЗИТЕ ТЕСТОВИ ЗА КОВИД-19, ГРАЃАНИТЕ МОЖАТ ДА ГИ ПРАВАТ БЕСПЛАТНО

Почна примената на брзите тестови за ковид-19, потврди за МИА д-р Виктор Исијановски, директор на Здравствен дом Скопје и член на Комисијата за заразни болести.

Здравствениот дом Скопје е прва здравствена организација во земјава што почна со изработка на брзите тестови. Станува збор за тестови од фирмата Abbott кои даваат 99,6 отсто точност на резултатот.

Во однос на постапката со овие тестови, прво се зема брис назоферигијално, потоа се става во епрувета во која има течност, потребно е од 15 до 20 минути, на една плочка се капнува каде што веднаш се добива резултатот.

Доколку е лицето позитивно, веднаш во текот на денот ќе биде известено од Институтот за јавно здравје кој понатаму ќе постапи со епидемиолошка анкета за лицето да биде ставено во изолација.

Денеска во Министерството за здравство, како што соопшти вчера министерот за здравство Венко Филипче, ќе пристигне донација од 13.000 брзи тестови. Тестовите, посочи, ќе бидат дистрибуирани по сите пунктови каде се врши тестирањето.

– Тринаесет илјади брзи тестови следната недела ќе бидат дистрибуирани по сите пунктови каде што се прават тестирања. Тоа се брзи тестови кои што се готови за 15 минути, тоа се најновите тестови, најновата технологија, со тоа уште повеќе се зголемува капацитетот на сите државни лаборатории и тоа ќе стане и редовна пракса на тестирање, рече вчера министерот Филипче.

Меѓутоа, за новите тестови се поставува прашањето дали ќе бидат бесплатни, или граѓаните ќе ги плаќаат по цена од 1.000 денари.

Некои граѓани на социјалните мрежи реагираат зошто ако овие тестови се донација, ќе ги чинат граѓаните по 1.000 денари. Кај нив се создава револт по ова прашање. Затоа, здравствените власти ќе треба да објаснат деали овие 13.000 тестови кои се донација, ќе се наплатуваат за граѓаните, или ќе бидат бесплатни.

„Добро, бре, Венко.. Нели овие тестови се ДОНАЦИЈА? Зашто народот да ги плаќа по 1000 денари? Кој како сака нека ме сфати. јас мислам, дека овие тестови треба да бидат бесплатни. Нели плаќаме здравствено осигурување?“, напиша на фејсбук Лина Јовановска.

Сепак, тестовите нема да се наплаќаат, туку единствено првите 4.000 дози, бидејќи се набавени преку тендер ќе имаат цена од 1.000 денари.

„Овие тестови ќе бидат дистрибуирани по пунктовите за тестирање, и бидејќи се донација, нема да им се наплатуваат на гараѓаните. Единствено, првите 4.000 дози што го набави Здравствен дом Скопје, бидејќи се набавени преку тендер, ќе имаат цена од 1.000 денари“, велат надлежните за Фактор.мк.