Желјазков: Авионите од Шведска ќе останат во Бугарија во текот на целиот месец август

Состојбата во Бугарија поради пожарите останува сериозна, а политичките дискусии за ова прашање треба да бидат конструктивни, а не деструктивни. Ова го изјави бугарскиот премиер Росен Желјазков на почетокот на денешната седница на Владата, пренесува БГНЕС.

Желјазков им се заблагодари на сите служби и лица ангажирани на терен во гаснењето на пожарите. „Сакам да изразам благодарност до сите вклучени на терен и за воспоставената организација за справување со огнената стихија,“ истакна тој.

Премиерот најави дека утре во бугарското Народно собрание ќе биде поднесен извештај за преземените мерки и искористувањето на средства од Оперативната програма „Животна средина“ за набавка на специјализирана опрема.

„Иако бараното сослушување не беше одобрено, ќе потсетам дека претходниот парламент ја задолжи тогашната влада да достави извештај за користење средства за набавка на специјализирана техника. Ние ја имаме потребната информација и утре извештајот ќе биде поднесен. Во одлуката стои и дека мора да се обезбеди финансирање за набавка на специјализирана летачка техника за потребите на МВР. Заради различните толкувања, наложив изработка на меѓуресорска анализа од Министерството за одбрана, МВР и Министерството за транспорт,“ нагласи Желјазков.

Тој додаде дека во август за гаснење на пожарите ќе се користи постојната опрема, како и таа што е обезбедена преку европскиот механизам за цивилна заштита. „Авионите од Шведска ќе бидат ангажирани во текот на целиот месец и ќе имаат база во Бугарија,“ истакна премиерот.