Жените доминираат меѓу наставниците на најмладите ученици во Бугарија – 94% наспроти 86% во ЕУ

Во Бугарија во 2024 година на еден наставник во основното образование во просек се паднале 10,4 ученици, што е под просекот на Европската Унија од 13,2 ученици на наставник, покажуваат најновите податоци на Евростат, пренесува БГНЕС.

Во основното образование во земјата во 2024 година биле запишани околу 234.500 ученици, додека бројот на наставници изнесувал 22.700.

Од вкупниот број наставници, 21.400 биле жени, а околу 1.300 мажи. Жените, според тоа, сочинувале приближно 94 отсто од наставниот кадар во основното образование во Бугарија.

На ниво на ЕУ, жените сочинувале 85,6 отсто од наставниците во основното образование, а мажите 14,4 отсто.

Според Евростат, најниско соодносот ученици-наставник во ЕУ бил во Грција, со 7,4 ученици на еден наставник, а потоа следува Луксембург со 8,2. Највисок бил во Романија – 18,2 ученици на наставник.

Над 15 ученици на еден наставник биле регистрирани и во Германија, Холандија, Чешка и Франција, при што за Чешка се користени податоци од 2023 година.

Евростат нагласува дека показателот за бројот на ученици по наставник не е ист со просечната големина на едно одделение. Тој се пресметува врз основа на бројот на ученици и наставници изразен преку еквивалент на полно работно време.

Бројот на ученици во основното образование во Бугарија во 2024 година бил за околу 0,8 отсто повисок во споредба со 2023 година, кога биле регистрирани приближно 232.700 ученици.

Во подолг временски период, сепак, се забележува значително намалување. Во 1985 година во основното образование во Бугарија имало околу 579.400 ученици, што е повеќе од двојно во споредба со 2024 година.

Бугарија е меѓу земјите од ЕУ каде што задолжителното основно образование започнува на седумгодишна возраст. Истото важи и за Естонија, Хрватска и Финска, додека во повеќето земји членки децата започнуваат со основно образование на шест години.

Во целата Европска Унија во 2024 година во основното образование биле вклучени околу 23,2 милиони деца. Најмногу имало во Франција – 4,1 милиони, потоа во Германија со 3,3 милиони, Шпанија со 2,8 милиони и Италија со 2,6 милиони.

Околу 83,6 отсто од учениците во основното образование во ЕУ учеле во државни институции, а останатите во приватни.

Податоците на Евростат се дел од заедничката база на податоци за образованието на УНЕСКО, ОЕЦД и Евростат. Податоците за 2024 година биле извлечени во април 2026 година.