Зеленски: Путин се обидува да ја измами Америка и да ги избегне санкциите

Рускиот претседател Владимир Путин се обидува да го манипулира американското раководство и да ја напушти меѓународната изолација. Ова го изјави украинскиот претседател Володимир Зеленски во интервју за „Скај њуз“, пренесува „Киев Индипендент“.

Зеленски посочи дека неколку рокови што ги поставил американскиот претседател Доналд Трамп поминале без воведување нови санкции против Русија.

„Тој (Путин) дефинитивно сака да ја измами Америка. Прави сè што може за да избегне санкции и да спречи САД и Трамп да му ги наметнат. Ако постојано се одлагаат санкциите, Русија ќе биде подобро подготвена“, изјави Зеленски.

Украинскиот лидер го повика Трамп да заземе „јасна позиција“ околу санкциите кон Москва и безбедносните гаранции за Киев. „Доналд Трамп има доволно сила за да го натера Путин да се плаши од него“, нагласи тој.

Зеленски исто така оцени дека средбата меѓу Трамп и Путин на 15 август во Аљаска му дала на рускиот претседател платформа да ја напушти политичката изолација без да плати соодветна цена. „Ако тоа беше трилатерална средба (со Украина), ќе имавме некаков резултат“, додаде тој.

По самитот, Трамп вети директни преговори меѓу Путин и Зеленски, но тие планови пропаднаа откако рускиот лидер го покани својот украински колега во Москва – покана која Киев ја одби.

„Трилатерална средба со Трамп останува моја прва опција“, рече Зеленски и го покани Путин да дојде во Киев.