Јотова и Пашинјан потпишаа декларација за стратешко партнерство во Ереван
Претседателката на Бугарија Илијана Јотова и премиерот на Ерменија Никол Пашинјан потпишаа во Ереван Заедничка декларација за стратешко партнерство меѓу двете држави, јавува БНР.
Јотова престојува во Ерменија по повод учеството на осмата средба на врвот на Европска политичка заедница, на која ќе присуствуваат лидери од околу 50 земји.
Двајцата соговорници го истакнале високото ниво на политички дијалог и оцениле дека постои неискористен потенцијал за развој на билатералните односи. Акцент бил ставен на продлабочување на соработката во економијата, енергетиката, безбедноста и одбраната.
Јотова и Пашинјан изразиле очекување новата влада во Бугарија да ја зајакне соработката меѓу Софија и Ереван. Ерменскиот премиер ѝ се заблагодарил за условите што Бугарија ги обезбедува за ерменската заедница, додека Јотова ја истакнала подготвеноста на земјата, како членка на Европската Унија 19 години, да ѝ помогне на Ерменија во процесот на поблиска интеграција со Унијата.
Меѓу разгледуваните теми биле и воените конфликти во Украина и Иран и нивните последици.
