Дејвид Гарет и Соња Јончева ја завршија „Гала во Софија“ пред повеќе од 6.000 гледачи
Дејвид Гарет и Соња Јончева настапија пред повеќе од 6.000 гледачи на плоштадот пред храмот „Свети Александар Невски“ во Софија, јавува БТА. Нивниот концерт „Сина ноќ“, кој ги спои класичната, популарната и бугарската музика, беше завршен настан на годинашната „Гала во Софија“.
Придружувани од оркестарот и хорот на Софиската опера под диригентската палка на Леонардо Сини, двајцата изведоа дела од Бах, Хендл, Паганини и Пучини, како и песни од Queen, The Weeknd, Bee Gees и Тејлор Свифт.
На крајот Јончева и Гарет заедно ја изведоа бугарската народна песна „Заблеяло ми агънце“, која оперската прима ја претстави како песна од своето детство. Концертот заврши со светлосни пораки на небото, меѓу кои „Културата е иднината“ и „Се гледаме во 2027 година“.
