Три албански студентки учествуваа на летниот семинар за бугарски јазик и култура во Велико Трново

Три студентки од Косово и Албанија учествуваа на 49-от Меѓународен летен семинар за бугарски јазик и култура во Велико Трново, каде што во текот на три недели го изучуваа бугарскиот јазик и се запознаа со историјата, фолклорот и културното наследство на Бугарија, јавува Радио Бугарија.

Леонора Хајра и Резарта Морина, докторантки по книжевност на Универзитетот во Приштина и наставнички по албански јазик и книжевност, биле избрани преку лекториите по бугарски јазик. Тие истакнаа дека семинарот им овозможил подобро да ја запознаат бугарската култура и нејзините сличности со другите балкански традиции.

„Запознавањето со кирилицата на почетокот беше предизвик, но убав предизвик“, изјави Хајра.

Еринда Нела од Тирана, студентка на магистерски студии по деловно право, почнала да учи бугарски јазик еден семестар претходно на Универзитетот во Тирана кај предавачката по бугарски јазик д-р Миранда Бело. Таа посочува дека нејзиниот интерес е поврзан и со семејното потекло, бидејќи нејзината прабаба имала бугарски корени.

„Кога учиш еден јазик, не го учиш само јазикот, туку и начинот на кој едно општество го гледа светот“, рече Нела.

Програмата вклучувала интензивна настава по бугарски јазик, предавања за историјата и фолклорот, традиционална музика и танци, како и посети на музеи и екскурзии во бугарските градови Русе и Казанлак.

На завршниот тест по бугарски јазик, Еринда Нела освоила максимален број поени и постигнала највисок резултат меѓу учесниците.