Националниот етнографски музеј со тридневна програма на „КвАРТал Фестивал 2026“

Националниот етнографски музеј на Бугарија ќе учествува во „КвАРТал Фестивал 2026: Иднината на стариот град“, што се одржува од 18 до 20 септември, со програма во музејот и со посебен штанд на плоштадот „Бански“.

Во рамките на кампањата на Институтот за етнологија и фолклористика со Етнографски музеј при Бугарската академија на науките (ИЕФЕМ-БАН) „120 години Национален етнографски музеј“, посетителите со купен билет, покрај музејските поставки, ќе можат да учествуваат во семејни работилници и да проследат серија стручни предавања.

Програмата започнува на 18 септември во 18:00 часот со историската тура „Кнежевскиот дворец – дух и архитектура“.

Во сабота и недела се предвидени образовните работилници „Лебот што нè обединува“ и „Код: Вез – креативно ателје за создавање музејски пасош на вез од Софискиот регион“.

Во програмата се вклучени и три научни предавања – „Занаети во градежништвото што исчезнуваат – традиционално дрводелство“, „Архитектонска средина и меморија: каде материјалното наследство се среќава со живиот занает“ и „Грнчарството во Тројан – жива традиција или загрозен занает?“.

За време на фестивалот продолжува и кампањата „120 години – 120 минути во НЕМ“. Во сабота и недела, од 10:00 до 12:00 часот, посетителите ќе можат бесплатно да ги разгледаат изложбените сали на музејот и да се запознаат со традициите, обичаите и начинот на живот на Бугарите од различни периоди и региони.

Целосната програма со информации за активностите е објавена на страниците на ИЕФЕМ-БАН и Националниот етнографски музеј на „Фејсбук“.

„КвАРТал Фестивал 2026: Иднината на стариот град“ се одржува со логистичка поддршка на Општина Софија и Советот на Општина Софија.