Бугарија и Германија со засилена соработка во туризмот и фокус на германскиот пазар

Министерката за туризам на Бугарија, Ирена Георгиева, се сретна со амбасадорката на Германија во Бугарија, Ирене Планк, со главна тема на разговорот можностите за продлабочување на билатералната соработка во туризмот и закрепнувањето на германскиот пазар, јавува БГНЕС.

Георгиева истакна дека „германскиот пазар е стратешки за нас“ и додаде дека целта е Бугарија да се позиционира како „сигурна, достапна и гостопримлива дестинација со разновиден туристички производ“. Таа нагласи дека, иако нивото пред пандемијата сè уште не е целосно достигнато, се забележува стабилен раст на резервациите од Германија.

Амбасадорката Планк ја пофали Бугарија за учеството на туристичкиот саем ITB Berlin и истакна позитивен меѓународен одзив.

На средбата беше потенцирано дека современиот турист сè повеќе бара индивидуализирани искуства поврзани со култура, природа и автентичност. Во тој контекст, Георгиева нагласи дека Бугарија се стреми да стане целогодишна дестинација преку развој на културен, вински, гастрономски, СПА и „slow tourism“.

Разговарано беше и за предизвиците во секторот, особено недостигот на работна сила и потребата од олеснување на процедурите за вработување странски работници. Дополнително, беше истакнато дека воведувањето на еврото засега не создава проблеми во туризмот.

Двете страни изразија подготвеност за понатамошно зајакнување на соработката со цел одржлив развој на секторот и привлекување повеќе германски туристи, вклучително и надвор од летната сезона.